Микроэлементүүд нь харьцангуй өндөр нягтрал, хувийн жин, атомын жинтэй, хортой нөлөөлөл өндөртэй элементүүд юм. Ерөнхийдөө микроэлементийн агууламж өндөртэй ус хэрэглэснээр хорт металлын био-хуримтлал үүсэх магадлалыг нэмэгдүүлж байдаг. Био-хуримтлал гэдэг нь ус, агаар, хоол хүнс зэрэг бүх эх үүсвэрээс бие махбодид бохирдуулагч бодисын хуримтлал үүсгэх юм (Ньюман, Унгер, 2003). Ундны усанд аюултай бохирдуулагч бодис зөвшөөрөгдөх хэмжээнээс их агуулагдаж байвал аажимдаа ходоод гэдэсний өвчин, мэдрэлийн систем эсвэл нөхөн үржихүйн тогтолцооны өвчин, хорт хавдар зэрэг архаг өвчин зэрэг эрүүл мэндэд сөрөг нөлөө үзүүлдэг болох нь олон судалгаагаар тодорхойлсон байдаг байна. Бохирдуулагч нь эрүүл мэндэд сөрөг нөлөө үзүүлэх эсэхэд нөлөөлж болох хүчин зүйлүүд нь бохирдуулагчийн төрөл, усан дахь концентраци, хувь хүний мэдрэмтгий байдал, хэрэглэсэн усны хэмжээ, өртөх хугацаа зэрэг орно.
