ГАДАРГЫН УС ГАЗРЫН ДОРОЙТОЛД НӨЛӨӨЛӨХ НЬ

Дэлхийн усны нөөцийн хувьд далайн ус 96.5%, давст нуурууд 0.9%, цэвэр ус 2.5% байна. Цэвэр усны нөөцийн хувьд мөсөн гол 68.7%, газар доорх ус 30.1%, гадаргын ус 1.2%-ийг эзлэдэг байна. Гадаргын усны нөөцийн хувьд мөстөл, мөсөн гол 69.0%, нуур 20.9%, хөрсний чийг 3.8%, намаг 2.6%, гол мөрөн 0.49%, агаар мандалд 3.0%, амьд организмд 0.26%-ийг эзлэдэг байна. Монгол улсын усны тухай хуульд “Усны нөөц” гэж одоо ашиглаж байгаа, цаашид ашиглаж болох гадаргын болон газрын доорх усыг хэлнэ гэж заажээ. Манай орны байгалийн усны нөөцийн 90 гаруй хувь нь гадаргын ус, зөвхөн 2 хувь нь газрын доорх ус гэж үздэг. Гадаргын усны 82 хувь нь нууранд, 10.4 хувь нь мөстөл, мөсөн голд, 5.6 хувь нь гол мөрөнд агуулагддаг. Манай улс усны нөөц багатай орны тоонд ордог.