Төв аймгийн Заамарын хөндийд сүүлийн 20-иод жилд уул уурхайн үйлдвэрлэлийн цар хүрээ эрчимтэй тэлж, олон арван уурхай шинээр нээгдэн ашиглалт явуулснаар тус бүс нутгийн гадаргын усны чанарт сөрөг нөлөө үзүүлэх болсон. 2014 оны 9 сард Туул гол, ёроолын хагшаас хурдас болон уурхайнуудын тунгаагуурын уснаас сорьч авч шинжлэхэд бичил элементүүд болох хар тугалга (Pb), зөөлөн цагаан (Cd), хром (Cr)-ын агууламж харьцангуй их илэрсэн. Бохирдуулагч үзүүлэлтүүдээр усны чанарын индексийг тооцож үзэхэд “Угалз гол” ХХК, хувиараа алт олборлодог “Ундрах” компаниудын хаягдал усанд харьцангуй өндөр илэрсэн талаар энэхүү өгүүлэлд дэлгэрэнгүй тусгасан болно.
