Сэлбэ гол, түүний татам дагуух газрын доорх усны чанарын судалгаа

Хүн амыг эрүүл аюулгүй баталгаат ундны усаар хүртээмжтэй хангах нь Монгол Улсын Засгийн газрын нэн тэргүүний зорилтын нэг билээ. Манай улс “Тогтвортой хөгжлийн үзэл баримтлал 2030”-ын хүрээнд 2030 он гэхэд баталгаат ундны ус хангамжийн үйлчилгээ хүртэж байгаа хүн амын эзлэх хувийг 90%-д хүргэх зорилт тавин ажиллаж байна.
Хотжилт эрчимтэй явагдаж, хөдөөнөөс хот руу чиглэсэн шилжилт хөдөлгөөнөөс шалтгаалан гэр хороолол жилээс жилд хүрээгээ тэлсээр байгаа билээ. Ийнхүү хүний үйл ажиллагаа, барилгажилтын нөлөөгөөр газрын доорх усны байгалийн шинж чанар, шилжих хөдөлгөөн, горимд төдийгүй түүний чанар, найрлагад өөрчлөлт оруулж байгаа юм. Сэлбэ гол хойноос урагш чиглэлд урсдаг учраас ус, хөрсний бохирдол Улаанбаатар хотын төвийн чиглэлд нэмэгдэх бөгөөд голын урсгал Нарны зам өнгөрмөгц огцом баруун тийш эргэж, Дунд гол нэртэйгээр Туул голтой параллелиар урсан, улмаар Туулд цутгадаг.